Kisah Masyarakat dayak (Nyai Balau)

NYAI BALAU

PART I

Katika huran intu ‘lewu Tewah’, (wayah tuh jari lewu hai, Kecamatan Tewah, daerah Kabupaten Gunung Mas, Provinsi Kalimantan Tengah), tege ije biti oloh bawi bahalap, arae “Nyai Balau”.  Ie inggare Nyai Balau awi ie babalau panjang tuntang bahalap tutu. Puna kahalap bau-matae, pupus bulue lamus malisen baputi. batarung sarita hapus batang danum Kahayan. Iye oloh bawi je randah atei, hormat dengan oloh bakas, tuntang tau dengan oloh are. Hatue je kueh je dia handak dengae. Tapi, dia oloh barangai je bahanyi “misek” (melamar) Nyai Balau, awi ie bara utus uluh basewut hung lewu Tewah te. Tuntang kea oloh bakas Nyai Balau mangilak anake te kawin dengan oloh hatue ije basewut kea.

Singkat kesah, tarung sarita kahalap Nyai Balau te, tara hining awi ije hatue bakena, je arae “Kanyapi”. Dia laluen kakenae, Kanyapi kea oloh ije pintar tuntang harati. Ie palus manyundau oloh bakas Nyai Balau palus misek dengan ewen, niat hajat handak manduan Nyai Balau akan indu sawae. Awi Kanyapi bara utus gantung tuntang oloh je basewut kea, maka oloh bakas Nyai Balau, manarima pisek Kanyapi. Huang katika segera balalu ilalus Pesta Pangawin Kanyai dengan Nyai Balau dengan pesta hai tuntang rami.

Awi Kanyapi dengan Nyai Balau jari mangabali arepe, te ewen ndue handak belum kabuat, melai huang eka kabuat. Palus ewen manyundau oloh bakas manyarita ampin kanahuang kapakat ewen. Oloh bakas Nyai Balau dia mangahana. Ye ewen melai ije huma kabuat ije jari imangun oloh bakas Nyai Balau.

Kanyapi dengan Nyai Balau belum sanang melai hung huma seruk ewen kabuat. Tuntang awi Kanyapi oloh je pintar tuntang harati, kea puna tau dengan oloh melai lewu te, ie irega tuntang ihormat oloh, dan kajaria Kanyapi inggatang oloh ie manjadi “Tamanggung” oloh manggare arae “Tamanggung Kanyapi.” Aluh te kea ewen ndue kabalie magun hindai sukup kahanjak, awi ewen ndue hindai ati mandinun anak. Tapi ewen ndue dia bagetus balakudoa, balaku asi bara Hatalla ije kuasa, uka tau manenga anak akan ewen.

Pire-pire nyelu tinai, kajariae ewen ndue mandinun ije anak hatue, bakena balinga. Narai dia kalaluen kahanjak Tamanggung Kanyapi dengan Nyai Balau tagal anak te. Ewen ndue mahaga anak te puna babuah, tuntang eka kaharap ewen, jeha anak tuh tau mimbit kasanang kahanjak, je sinta oloh bakas tuntang kare tundah kula. Tamanggung Kanyapi dia mangahana anake pakat busik bangang dengan anak tabela lewu, uka ie kasene tuntang tau pakat dengan oloh are. Puna bahalap ih ampin kahimat atei Tamanggung dengan anak hatue je ije-ije te.

Genep andau anak te busik bangang dengan anak tabela lewu. Hung sinde andau anak Tamanggung Kanyapi dengan Nyai Balau te dia buli-buli, sampai andau jari sasanja. “Boh, lehae anak itah palus hindai buli ampie, kuan Nyai Balau dengan kabalie. Mikeh magun bangang herah, kuan Kanyapi.”

Andau lius hamalem, karatak lewu jari kaput pijem anak Kanyapi-Nyai Balau hindai kea buli. Has, itah manggau anak itah te.! Kuan Nyai balau. Tau layang hayang ie.!

Ye lius kea ewen ndue mangumbang lewu Tewah kau, manggau anak ewen ndue. Hoii, hoii ewen nambawai mangahau anake… hindai kea sundau. Alem jari ambu, kaheka puna sadang kea, Kuan Kanyapi, keleh itah buli helu, jewu tinai itah manggau anak itah. Ye ewen ndue buli palus batiruh.

Hung tampalawei andau Tamanggung Kanyapi mantahau oloh lewu, mansanan anak ewen nihau layau. Ye, Tamanggung Kanyapi dengan Nyai Balau tuntang oloh lewu te mangumbang hapus lewu, mamantu garantung mangahau anak te. Pire-pire andau mahin  dia sundae kea.

Nyai Balau tutu pehe atei tuntang mangkeme manyasal, awi manalua anake busik bangang laju-lajur sampai sa-sanja. Anak tunggal ije biti eka kaharap huang, nihau layang.

Hung ije katika Nyai Balau, benye-benyem tulak bara lewu humae, palus manalih ije himba, je jahai oloh talihe. Hung hete Nyai Balau “balampah”, mikeh tege asi Hatalla ngambu, mansanan tahiu anake je nihau layau nah. Uju andau uju alem katahie Nyai Balau balampah. Hung andau kauju te atun dumah oloh bakas, ije tambi manggapi ie palus mansanan narai mawi anak ewen jatun tau sundau.

Oii, esu (kuan tambi te) aku mangatawan narai jalanam, ikau manggau anak hatuem je hayang nah. Yoh, tambi puna tutu (kuan tumbah Nyai Balau). Keleh ikau buli ih (kuan tambi), anakm te dia je hanyang, ie jari matei. Ie “ingayau” awi Antang bara Juking Sopang, kuan oloh bakas te.

Mahining auh tambi te, Nyai balau tarewen, palus nambawai manatum anake je jari matei awi kayau bara Juking Sopang, je bagare “Antang”

Huang kahetang angat atei, Nyai Balau hamau, kareh ie keme Antang te aku “mambaleh bunu” (balas dendam), aku dia manalua ie..!!

Iyoh, esu, kuan tambi te, amun puna niatm mambaleh bunu dengan Antang, tuh inengaku akam kaji kagancang tuntang “bahalai sakti”, hapan manaharep kare musuh aim.

Nyai Balau dia kalapean batarima kasih dengan tambi te, je jari manenga kaji tuntang bahalai sakti, tambi te palus lilap taharep ie.

Limbah te Nyai Balau, buli akan lewu humae. Hung humae jari mentai banae Tamanggung Kanyapi tuntang kare kula babuhan. Ewen pehe atei, awi Nyai Balau lilap jatun kabar saritae pire-pire andau.

Nyai Balau mansanan ampin jalanae, je malihi lewu huma, palus akan himba, balampah, manggau petunjuk bara Tuhan je Kuasa tahiu anake je hayang nihau, tuntang ie jari inyundau oloh bakas je manenga akae bahalai sakti te.  Aluh Kanyapi pehe atei mahining kesah sawae Nyai Balau, ie atun kasalawah angat awi sawae Nyai Balau jari buli dengan salamat.

Balalu Nyai Balau mimbit Tamanggung Kanyapi kea dengan oloh lewu Tewah tulak akan Juking Sopang, handak mambaleh bunu dengan Antang. Sana sampai Juking Sopang, Nyai Balau palus mantehau kayau jebagare Antang nah, uka ie dumah tangguh ewen tuntang mangaku kasalae hayak balu ampun.

Oiii… Antang..! En tutu ikau mangayau anakku? Amun puna tutu keleh ikau mangaku bua-buah tuntang balaku ampun dengangku tuntang kabalingku Tamanggung Kanyapi, sahelu bara aku nihau kasabar dengam..!! Kuan auh Nyai Balau.

Lelalehan katamammu! Kuan Antang tumbah. Ela ikau barangai auhmu dengangku, jatun aku menetek kuluk anakm te. Tau ikau kareh je netekku..!

Boh! Buju-bujur Antang, aku tuh magun sabar, keleh ikau mangaku ih. Aku mangatawan taluh gawim, dia ulih ikau mananjaru aku.

Puna lecak kajuhu (kasombong) Antang, dia kea ie mangaku tuntang balaku ampun.  Awi ie mangkeme uluh hatue je gancang tuntang mamut, te ie malah manyilak mandau, manejep Nyai Balau. Kalahi dia balang kea, Antang puna mahimat mampatei Nyai Balau, ie puna oloh je mamut Menteng hayak tamam kare kaji lampahe kea. Tapi ie dia ulih mampahimang Nyai Balau. Nyai Balau puna mangat ih mambuang kare tejep simbur mandau Antang. Nyai Balau puna dia bawi barangai, tamam ampin kaapike manaharep Antang. Tepa rise kea Antang, palus ie manejep buta irah, sambil gantau dia tau kana. Balalu Nyai Balau mangibar bahalai sakti nah mangana Antang, palus Antang manjatu taleku, balemu kare utut siku Antang.

Ampie lague,  Nyai Balau magun tege niat bahalap, ie dia handak mampatei Antang. Nyai Balau dengan Tamanggung Kanyapi mamakat dengan kula babuhan Antang uka kalahi te tende, dan handak badamai dengan ewen, baya Antang harus mangaku kasalae tuntang membayar manumun Adat Dayak Nguju, Antang buah singer.

Tapi Antang puna oloh je batekang atei, tuntang dia handak mangalah, awi puna ie mangkeme oloh je tamam mamut Menteng, ie dia mangaku kalah taharep Nyai Balau. Ye dengan sakalep kare pangatawae, kaji lampah ayue, Antang hingkat marawus, haluli manejep Nyai Balau. Te kalahi hati puna dia tau balang, oloh are umba kea kajaria kalahi te. Nyai Balau manaharep Antang, je beken manaharep je beken. Hapus Juking Sopang hewui daha, kalahi puna hapatei ndai. Dan Nyai Balau dia manenga ampun akan Antang palus ie mahewes bahalai sakti ayue kana Antang, Antang tajarungkup palus matei hung lengan Nyai Balau.

Kalahi te tende awi Antang matei, balalu Nyai Balau, Tamanggung Kanyapi dengan rombongan buli akan lewu Tewah, awi mangkeme jari mambaleh bunu, ewen malihi Juking Sopang je hewui daha. Awi are je matei hete termasuk Antang. Awi te Juking Sopang smpai wayah tuh inggare oloh “Rangan Daha”

Limbah peristiwa kalahi hai te, Nyai Balau tambah batarung sarita, ie ingikeh oloh hung lewu Tewah. Jatun ije je bahanyi merusak lewu. Oloh lewu Tewah manggatang Nyai Balau kilau ije “Pangkalima” (pahlawan dan pemimpin sakti). Manggatang sewut sarita lewu Tewah je sasar rami tuntang aman.

Ampie lague, hung lewu Juking Sopang magun mingkes kasangit hai. Ewen tundah kula genep babuhan Antang je matei nah ewen te mangun dendam, dan handak mambaleh bunu tinai, ewen menyusun kare strategi, mengumpul oloh are je balinga, uka mambaleh bunu manyarang lewu Tewah dan Nyai Balau dengan Tamanggung Kanyapi (ampie lague cagar kalahi hai tinai je akan inaharep ewen)

Limbah babuhan taliau Antang jari pakat, te ewen tulak handak manyarang lewu Tewah, dan mamaleh bunu dengan Nyai Balau ewen ndue Kanyapi.  Ewen dia manyuru batang danum, tapi ewen maliut mananjung mahalau parak kayu, sewu janah, mandai bukit, mananjung benye-benyem uka oloh dia mangatawan pandumah ewen.

Metuh andau sasanja babuhan Antang bara Juking Sopang sampai hung “Bukit Ngalangkang”. Bukit te pas hung likut lewu Tewah. Ewen tende, palus maatuh kare rancana, handak manyarang lewu Tewah metuh andau hamalem, manunggu oloh batiruh bakalis. Sampai katika andau jari hamalem, te babuhan bara Juking Sopang muhun bara Bukit Ngalangkang, handak tame lewu Tewah. Sana tukep lewu Tewah, ewen kau pules pindi, sasat jalan, boh, haluli akan Bukit Ngalangkang tinai.

“Haww!!! kuan auh ije biti.  “ Mbuhen itah pules pindi, taputa-putar melai hung bukit tuh ih.? Lehae itah dia tau manampayah lewu Tewah te? Lehae itah kilau hayang, haluli akan bukit Ngalangkang tuh? “Amun kilau tuh dia tau itah tame lewu Tewah kau, mahin amun itah mambaleh bunu??!! kuan ije biti tinai.

“Oh… pasti awi taluh hapan Nyai Balau kau, kuan ije biti. Ie jari mandiding lewu Tewah te hapan salatutup, uka itah dia tau manampayah tuntang tame ka hete..!!”

“Amun kilau te, has itah membuka salatutup te, mahapan kare kaji patua itah, kuan je beken.”

Puna sakalepah pangatawan ewen bara Juking Sopang, handak membuka dinding/pagar lewu Tewah,  kilau kaji “salatutup” ayun Nyai Balau, puna dia tara buka kea. Ampie labih gantung kaji Nyai Balau.

Hung kapusang angat babuhan bara Juking Sopang, ewen hamauh : “Amun kilau tuh dia bakae itah tau mambaleh bunu, malawan Nyai Balau, membuka salatutupe gin itah dia ulih, mahin amun itah manaharep bitie…!! Awi te keleh itah bulih ih, itah dia bakae manang manaharep Nyai Balau te!!”

Ye, babuahan bara Juking Sopang, haluli buli akan Lewu Juking Sopang, hayak dengan kapehen atei ewen, awi balang mamaleh bunu. Puna dia tara tanding kea je Nyai Balau te. Puna Nyai Balau jari mangatawan ampin rancana tuntang pandumah babuhan bara Juking Sopang te…. awi te ie mamasang salatutup lewu. Puna ie dia mangahandak kalahi hai tinai,

Harue limbah te Nyai Balau manyarita ampin tiruk itung babuhan bara Juking Sopang, akan warga Tewah, basa ewen handak manyarang lewu Tewah, tapi dia ulih menembus salatutup lewu.

Limbah peristiwa jete, Lewu Tewah puna jatun ije je bahanyi mangaraee. Kute ampin kahalap lewu Tewah, manjadi lewu je aman tuntang jatun ije biti je bahanyi mawi gawi sala, awi kikeh tuntang kahurmat oloh lewu dengan Nyai Balau.

Sampai hapus umur pambelom Nyai Balau, ie manjadi pangkalima je batarung, tuntang bahalap taluh gawie. Ie oloh ije sinta kapakat tuntang ie halajur ingenang oloh are….. Sampai tuh aran “Nyai Balau” tatap basewut…… Ie kilau tampengan “Bawin Dayak Babalau Panjang je manjadi Pangkalima”.

Tagal Tarung sarita Nyai Balau, je turun menurun sampai wayah Balanda manjajah Indonesia, mawi kare sardadu Balanda mikeh/ dia bahanyi  manggapi lewu Tewah.


PETEH PENYANG  :

1. Babuah mahaga anak, ela laya, ela lalau manalua anak busik bangang dia katawan jam ie buli ka huma.
2. Ela Balecak / bajuhu kilau Antang, sagantu-gantung ilmu tege hindai je labih gatung, keleh randah atei. Dan ela itah manguan gawi je dia patut, mawi mampatei oloh, dia handak  mangaku kasalae, dia handak balaku ampun maaf. Itah amun sala keleh balaku maaf.
3. Nyai Balau patut akan indu suntu, ampin sintae, asie, dengan oloh, aluh oloh sala dengae. Iye dia manggau kasuat, Bahalap baue matae, bahalap ateie, tapi amun sasat jake, ie  “Isen Mulang” pantang mundur bara kabujur.